Wiil Dhallinyaro ah oo Hal abuur ganacsi Baledweyn ka sameeyey
Caqabadaha dhinaca shaqada ka haysto dhalinyrada waxbaratay ee ku nool Baladweyne ayaa bartay qaarkood in ay sameeyaan hal-abuur Ganacsi oo Magaalada aanan horey uga jirin.
Koox dhallinyaro isu tagay ayaa magaalada ka sameeyay Mehrad yar oo ay ku iibiyaan kalluunka bisil iyo kuwa ceeriinka ah. Waxa ay sameeyaan in macaamiisha ay ugu geeyaan halka ay joogaan.
Mustaf Faarax Barqadle oo ku jira da’da Labaatameeyada, sanadkanna soo dhameeyey Dugsiga sare ayaa ah aas-aasaha goobtan, oo dhallinyaro badan shaqo abuur u noqotay.
Waxa uu waayey dhowr shaqo oo uu isku dayey, waxaana ku dhalatay sameynta howshan, oo wax badan ka bedeshay noloshiisa, iyo tan reerkiisaba.
900$ ayaa ku baxday maalgalinta xaruntan, oo uu u arkay fursad ka banaan magaalada. Xaruntan uu Hirgeliye Mustaf, waxa ay u qeybsan tahay qeyb xarunta lagu cuno, qeyb dadka Goobaha Ganacsiga loogu geeyo, iyo qeyb Maleeyga aan bisleyn lagu iibiyo.
Dhaqaalaha Goobtan ka soo gala ayuu sheegay in uu ku maareeyo Nolosha Qooyskiisa tan waxbarashadiisa iyo dhalinyaro la dhalatay oo uu ka Bixiyo Waxbarashada School-ka.
Barnaamijka Wadaagga ayuu uga waramay Rajada uu ka leeyhay in ay xaruntiisu intaan ka sii Balaarato.
“Waxaa ii suurta geliyey howshan labadeyda waalid oo aan u mahadcelinayo Allah ka sokow, runtii mudo laba sano ah ayaan shaqo la’aan ahaa, laakin hadda, waxbarashadeyda, biilka Qoyskeyga iyo kan waalidkaba halkan Ayaan kasoo saaraa” Ayuu yiri Mustaf.
Wuxuu hadalkiisa raaciyey “ runtii Caqabadaha aan la kulmay waxaa kamid ah Dadka inta badan aanan Kaluunka Fahansaneen maadaama anaga Gobol aan ka shaqeyno. Waxaa dhaceysa in mararka qaar laga waayo oo kalluunka”.
Cumar Cabdi Cismaan waa wiilka ugu yar ee xaruntaan ka shaqeeya, waana Laba iyo Toban jira.
Cumar oo jooga da’da waxbarashada nasiib uma helin jaanqaado caruurta asaagii ah ee waxbarashada aada. Qoyskiisa oo ka kooban Lix caruur ah oo isaga la dhalatay iyo Hooyadood, ayaa keentay in uu noqdo isha ay qoyska ku tiirsan yihiin hadda.
Lacag u dhaxeysa Konton Kun ilaa Todobaatan iyo Shan oo shilinka Soomaaliga oo uu si maalinle ah goobtaan looga siiyo ayuu Hooyadii kula noqdaa, si ay wax ay cunaan qoyska loogu sameeyo.
“Halkaan waxaan u joogaa, in aan shaqeysto si aan Hooyo u caawiyo, Kalluunka & Maraqa iyo Waxa aay Dadku rabaan Ayaan ugu geeyaa halka ay joogaan, sidoo kale alaabta ayaan Dhaqaa. Qof Dugsi I geysa ayaan waaye oo wax ibra, Waalidiinteyda Hooyo waa shaqeysaa, Aabana Xamar ayuu jiraa, Lacagta aan helo Hooyo”. Ayuu yiri Cumar.
Ganacsatada Magaalada Beledweyne ayey fursad u noqotay, taas oo meesha ka saartay in haddii ay u baahdaan Kalluunka ay xiraan goobta ganacsi, ama ugu yaraan ay uga tagaan qof ay xigta yihiin.
Cabdi Cali Jeele oo ka mid ah ganacsatada, kuna Xunta Irid Aamin ayaa ka waramaya faa’iidada ay ku qabaan hal-abuurkan ganacsi oo uu hirgaliyey Mustaf.
“Dhalin yaradan halkan ku iibiyo Malaayga waxay ay soo kordhiyeen xirfad aan horay Magaalada looga baranin, inkastoo goobaha lagu iibiyo Malayga ay ku yartahay Baledweeyne. Malayga waxa ay kuugu keenayaan goobtaada isaga oo diyaarsan. Awal markii hore ma aysan jiri jirin in malay diyaar san goobtada laguugu keeno” Ayuu yiri Cabdi Cali.
W/Q:- Cumar Muxidiin Cumar, oo jooga Baledweyn, kana tirsan Radio Hiiraanweyn.